طالبت المحامية نهاد أبوالقمصان، بالقبض على عريس الإسماعيلية قائلة: “إحنا قدام مجموعة من الجرائم ومش عارفة ليه متقبضش عليه؟ هي تسامح ماشي، لكن قيم الأسرة المصرية فين؟ دحنا فضحنا دوليا ومحليًا؟ وممكن يتحاسب بالمادة 25 من قانون جرائم الإنترنت”.
المادة 25 من قانون جرائم الإنترنت
وتساءلت في مداخلة هاتفية خلال برنامج "كلمة أخيرة" الذي تقدمه الإعلامية لميس الحديدي على شاشة "أون إي": “لما البنات بتوع التيك توك طلعوا رقصوا قفشوهم ليه! هي قيم الأسرة اتخضت أوي ومنامتش الليل عشان بنت رقصت على التيك توك، وهذا لم يحدث في واقعة ضرب عروس الإسماعيلية”.
وتابعت: “وزارة التضامن عندها مكان لاستضافة السيدات المعنفات، ولكن معندناش غير 8 بيوت استضافة، ومحتاجين زيادة، وتعاون مع وزارة الداخلية”.
ووجهت رسالة للفتيات قائلة: “الست اللي تنضرب ممكن تكلم المجلس القومي للمرأة أو الشرطة”.
ووجهت رسالة للرجال الذين يمارسون العنف قائلة: “الراجل الضعيف الفاشل هو اللي يمد إيده على مراته.. ولو عارف إنه لما هيمد إيده هي هتضربه أو أهلها هيطحنوه مش هيمد إيده.. وهو بيمد إيده عشان هي أضعف منه.. برنس الليالي ضراب النساء ده ميعرفش يضرب شوال خيار في السوق.. لأنه لو ضرب شوال الخيار هيبوظ منه كام كيلو وهيدفع تمنهم.. لكن هو فش غله في البت الغلبانة”.
واختتمت: “مفيش راجل محترم يعمل كده، ولازم يتقبض عليه.. ده لو راجل باس مراته في الشارع بتتعمله قضية.. وده لازم يتعالج ويتأهل لأنه مش عارف يسيطر على غضبه”.
