علقت المحامية نهاد أبوالقمصان، على فيديو ضرب عروس الإسماعيلية، قائلة: "بتشيرولي فيديو إن عروسة في الإسماعيلية انضربت علقة موت أمام الكوافير يوم فرحها من العريس.. وزعلانين إن الفرح كمل.. وبتقولوا إزاي البنت تقبل إنه يتعمل فيها كده؟!".
قصة ضرب عروس الإسماعيلية
وأضافت أبوالقمصان، أنها شاهدت جميع الفيديوهات وعرفت القصة كلها وعرفت أنهم عائلة في بعضهم، معقبة: "الفيديوهات التي تم تصويرها بعد ذلك مفيش فيها ولا ست من الستات اللي كانوا بيصوتوا قبل كده طلعت قالت رأيها.. والرجالة قالت إنكم فهمتم غلط.. إنتم مشفتوش وإنتم ما بتشفوش أصلًا.. دي العروسة كان أغمى عليها عشان كانت محتاجة سكر".
وتابعت: "حمام ودلع وولاد عم وقصة حب مولعة في الدرة من زمان.. ده الكلام اللي اتقال.. وجايبين العروسة لابسة أبيض في أبيض والعريس لابس أبيض في أبيض زي الملائكة.. طيب إنتوا عايزين إيه بقى.. أبوها راضي وأنا راضي ومالك إنت ومالنا يا قاضي".
وأكملت: "حطوا نفسكم مكان البنت الغلبانة دي.. المفروض تعمل إيه.. مفيش أهل بيدعموا نهائيًا.. وأبوها إللي باس على راسها عشان يهديها.. والواضح إنهم أخذوها وهدوها وظبطوا لها المكياج وكملوا الفرح.. طب نعمل إيه في الحالة دي.. إنتوا ليه شايفين إن عندها من القوة إنها تقدر تكمل في إجراءات قانونية وما تتنازلش عن المحضر ؟!.. عشان أي حد يقدر يكمل في إجراءات قانونية لازم يكون عنده دعم من العائلة.. طب العائلة بتقول إننا أسرة مع بعضينا.. لا دولة قانون ولا دولة بتنجان ومالكوش دعوة.. أبوها راضي وأنا راضي ومالك إنت ومالنا يا بوليس ويا قاضي!".
