هاجم المسئول عن الصفحة الرسمية لمؤدي المهرجانات حمو بيكا، متابعي الصفحة، بعد تعليقات حملت التنمر لبيكا، حسب وصفه، مستنكرًا الشماتة والحقد التي تحملها التعليقات.
مسئول الصفحة: حسبي الله ونعم الوكيل
وكتب المسئول عن الصفحة: "بجد شكرًا جدًا للناس اللي بتتنمر والناس اللي شمتانة والناس اللي فرحانة في المرض.. بدل ما تدعوا لحمو دعوة كويسة وتتمنوله يقوم بالسلامة.. بتتنمروا عليه وشمتانين فيه.. بجد عمرنا مهنرتقي أبدًا ولا هننضف ولا نعرف نتمني الخير للناس أبدًا.. الحقد والغل والغيرة بقوا مسيطرين على البشر بطريقة غريبة.. حسبي الله ونعم الوكيل في كل واحد بيعمل كده بجد".
حمو بيكا ينقل إلى المستشفى بعد بكائه على الهواء
وكان أعلن المسئول عن الصفحة، منذ ساعات قليلة، عن نقل مطرب المهرجانات حمو بيكا، في الساعات الأولى من صباح اليوم السبت، إلى المستشفى، بعد بكائه على الهواء ببرنامج "كلام الناس" المذاع على قناة إم بي سي مصر، حيث نشرت صفحة بيكا الرسمية على موقع "فيسبوك"، صورة له وهو على سرير المرض في المستشفى، مصحوبة بتعليق: "ادعوا لحمو بيكا يقوم بالسلامة يا جدعان.. وحسبي الله ونعم الوكيل في اللي كان السبب".
وكان مطرب المهرجانات حمو بيكا تحدث من جديد عن قرار إيقافه من قبل نقابة المهن الموسيقية برئاسة الفنان الكبير هاني شاكر، مشيرًا إلى أنه ليس مطربًا لكنه مؤدٍّ.
وقال، خلال لقائه ببرنامج "كلام الناس" الذي يذاع على قناة MBC مصر: "أنا مش صوت، أنا داخل بجمهور أنا راجل مؤدي، مش لازم يكون صوتي كروان عشان يدوني الكارنيه، أنا أي دولة عربية بتسمعني، مينفعش، ليا الجمهور دا كلو وحضرتك متصنفنيش".
وأضاف: "أنا ليا جمهوري، أنا أهم حاجة تصنفني، راب أي حاجة بس المهم تصنفني، في الدستور حرية الرأي، ملكش تمنعني أنا مش بعمل حاجة غلط، كل حاجة النقابة بتطلبها بعملها، أعمل إيه تاني، إنت بتقولي أخرج بره مصر، لا أنا مصري، ولازم الامتحانات تمشي بما يرضي الله".
وتحدث عن وقوع ظلم عليه، مرددًا: "مش داخل امتحانات النقابة تاني، مش عايزها خلاص، وكورسات الصوت مش بتتعمل غير لحمو بيكا، احكموا بالعدل، أنا تعبت، محدش حاسس باللي أنا فيه.. أنا مش عايز حاجة غير إني أكل عيش، في افترا وظلم، أنا صوتي كده، ومش عايز أغني خلاص".
الجمهور يشكك في حقيقة تعرضه لأزمة صحية
ورغم أن حمو بيكا أراد الحصول على تعاطف جمهوره معه، إلا أن صورته على سرير المرض، حصلت على العديد من التعليقات التي أفادت بافتعال حالته المرضية بسبب خضوعه لفحص رسم قلب، رغم ارتدائه خاتم بيده، وذلك يتعارض مع طبيعة هذا الفحص، ما عرضه لانتقادات واسعة.
جدير بالذكر أن نقابة المهن الموسيقية، كانت أعلنت في 17 نوفمبر 2021، عن قائمة تضم مطربين وفرقًا مشهورة بتقديم المهرجانات، شملها قرار المنع من الغناء، وهم: أبوليلة، الديزل، الزعيم، العصابة، المدفعجية، أوكا وأورتيجا، حسن شاكوش، ريشة كوستا، علي سمارة وأحمد عوت، الدخلاوية، ولاد سليمان، حمو بيكا، شواحة، نجوم المهرجانات، علاء فيفتي، عمر كمال، عمرو حاحا، فرقة الصواريخ، فرقة العفاريت، فرقة الكعب العالي، كزبرة وحنجرة، مجدي شطة، وزة مطرية، وعنبة.
