كشفت الفنانة بسمة عن أنها تعرضت لواقعتي تحرش في أحد التجمعات منذ نحو 10 - 12 عامًا، قائلة: "مبحبش أتكلم في تفاصيل الحوادث دي لأنها بتوجع.. وربنا ستر.. مبلغتش لأن ده حصل من ناس معرفهاش".
وأضافت بسمة خلال لقائها ببرنامج "الستات" الذي تقدمه الإعلاميتان مفيدة شيحة وسهير جودة على قناة "النهار": "أول مرة فيه ناس عرفوا يعدوني من وسط التجمع ده لحد ما دخلت مكان مقفول، وتاني مرة كانت حادثة كبيرة، ربنا خلى واحد ابن حلال يقفلي، وعرف في الآخر أنه ينقذني من وسط الواقعة ويحطني في عربية".
الست قليلة الحيلة ونفسها أي حد ينجدها
استكملت: "حاولت أصوّت لكن الحادثة كانت أكبر من أني أعرف أتصرف معاها، لدرجة أني في لحظة وقعت على الأرض وكان فيه أكتر من 100 قدم فوقيا، في اللحظة دي قولت أنا هموت خلاص، الموضوع عدى التحرش، مبحبش أفتكر التفاصيل".
استطردت: "بعد الواقعتين دول فيه حد حاول يمد إيده عليّا فقدرت أمسك إيده وألطشه بالقلم.. الواحدة في اللحظات دي بتبقى حاسة إنها قليلة الحيلة ونفسها أي حد ينجدها، وأكتر إحساس بيقتل لما عينك تيجي في عين حد وأنتي بتستغيثي وميعبركيش".
