تصدر الفنان محمد نجاتي، تريند جوجل، بعد الكشف عن تفاصيل المشهد الذي جرى الحديث عنه مؤخرا على مواقع التواصل الاجتماعي باعتباره سببا في طلاق الفنانة منه عرفة، وذلك خلال تصوير مسلسل "فيلا 101".
وقال الفنان محمد نجاتي في مكالمة هاتفية لـ"ET بالعربي": "كل الحكاية إن أنا بعمل مسلسل فيلا 101، ومعايا منة عرفة وهي عاملة دور أختي وأنا دكتور أمراض نسا في المسلسل، وفي مشهد بالمسلسل وهي بيغمى عليها وهي حامل من ورانا وأنا بشيلها، فرفضت منة إنها تتشال قولتلها أنا معنديش مشكلة إني أشيلك أو لا، إحنا في النهاية بنمثل مشهد مطلوب مننا، وأنتي أصلا أختي في الحقيقة، وحصلت مشكلة فقولت لهم متعلموش المشهد دا".
"نجاتي" لمنة عرفة: مش عايزة حد يلمسك متنزليش من البيت
وأضاف: "المشهد التاني أنا المفروض دكتور أمراض نسا، وأختي بيغمى عليها فأنا بكشف عليها، بعد كدة بكتشف أنها حامل، هكشف عليها إزاي من غير ما جس النبض، فقلت ليها هجس نبض إيدك، فقالتلي مش هينفع برضه، فأنا هنا عملت مشكلة، مش معقول بقى، إنتي مش عايزة حد يلمسك خلاص متنزليش من البيت أصلا ومتمثليش، إزاي اكتشف أن أختي حامل فى المسلسل من غير كشف، وصممت إني أعمل الدور كما يجب".
وتابع: "فوجئت تاني اليوم من الناس بتقول إن هذا المشهد كان سبب طلاقها، وأنا بريء تماما، فالمشهد لم يكن فيه قبلة أو رومانسي حتى".
وكان محمود المهدي زوج منة عرفة، قد أعلن منذ أيام عبر "ستوري" حسابه على "إنستجرام"، عن انفصالهما، قائلا: "الناس اللي بتتصل وتسأل، خلاص كل حاجة قسمة ونصيب، وأنا كراجل شرقي صعيدي، فيه حاجات مش هتنفع معايا، وهتوقفها عن شغلها وحلمها وأصدقائها في الوسط الفني، فأكيد مش هقف في ده، وربنا يكرمها في المجال الفني، وتوصل أعلى حاجة فيه بالتوفيق للجميع".
