«محرم فؤاد عقدنى من الجواز ومش ندمانة على مشاهد الإغراء».. عايدة رياض تشعل السوشيال ميديا بتصريحات نارية

حلت الفنانة الكبيرة عايدة رياض، ضيفة مع الإعلامية لميس الحديدي ببرنامجها "كلمة أخيرة"، المذاع على قناة "أون"، وكشفت عن العديد من الأسرار الشخصية فتحت صندوق ذكرياتها وكشفت عن أسباب زواجها من الفنان الراحل محرم فؤاد، رغم فارق السن الكبير بينهما.

عايدة رياض: متجوزتش غير محرم فؤاد وضربنى علقة موت بسبب الغيرة

أكدت أنها كانت مرتبطة عاطفيًا بشخص ما، وكانت هناك العديد من المشاكل والخلافات بينهما لاختلاف الديانة، وفي نفس التوقيت تقدم للزواج منها الفنان محرم فؤاد، مرددة: "حبيت أغيظ الشخص التاني، وبعدين عملت خطوبة بس معرفتش أفسخها، واستمر جوازي بمحرم 12 سنة، ووقت ماتجوزته كان عندي 20 سنة".

وأوضحت أنه وعدها أن تكمل مشوارها الفني بعد الزواج ولكن ما حدث عكس ذلك، واستمر الحال 8 سنوات كان يرفض فيها عملها، وبعدها عملت مع يونس شلبي في فيلم من إنتاجه بعد موافقة محرم فؤاد على مضض.

وأضافت: "محرم كان إنسانًا جميلًا وبيتوتي بس كانت فيه عصبية، ولما ابتديت أرجع أشتغل كنت أنانية وفضلت إننا نبعد، وكنت وقتها بفكر ابني حياتي الفنية زي ماهو بنى حياته".

واستكملت: "أنا ماتجوزتش بعده ولا مرة، بسبب العقدة اللي حصلتلي، وفيه مرة اتخانق معايا خناقة كبيرة بسبب الغيرة وإحنا في لندن وبعديها ضربني علقة موت، ولما بليغ حمدي شافني هناك قاله إنت مجنون إنت هتروح السجن".

 

أخويا بعت لـ بابا جواب وقاله عايدة هتبقى "غازية"

وروت النجمة عايدة رياض، عن كواليس التحاقها بمدرسة الفنون الشعبية في طفولتها، وقالت إنها كانت تمارس رياضة الجمباز كما كانت تعزف بيانو وأكورديون بالمدرسة.

وتابعت: "حينما التحقت بمدرسة الفنون الشعبية كان هناك مدربون روس، وأرسلت خطابًا لوالدي في اليمن أن يحضر لي ساعة وبنطلون حينما يعود".

واستكملت: "أخويا بعت لبابا جواب وقاله ماتجبش لعايدة الحاجة اللي هي طلبتها يا بابا، عايدة هتشتغل غازية، ولما بابا جه وشاف الفرقة والنظام وافق لما اطمن عليا".

 

عايدة رياض: لو مكنتش عملت أفلام مقاولات كنت هعيش منين

علقت الفنانة عايدة رياض، على مشاهد المقاولات أو التجارية، قائلة: "عملت أفلام مهمة، وفي غيرها مش مهم، ومش ندمانة على نوعية أفلام المقاولات، لسبب بسيط؛ هو الإجابة عن سؤال: يعني إيه أفلام مقاولات؟، يعني الإنتاج الضعيف، يعني أجري هيبقى ضعيف.. مش معناها إني هاخد أجر أكثر.. الناس فاهمه أفلام المقاولات غلط".

وردًا على سؤال الإعلامية لميس الحديدي: "طيب لما هي مقاولات وأجرها قليل بتعمليها ليه؟، فقالت: "هو أنا هفضل معتمدة على 3 أفلام عملتهم مع الكبار وخلاص؟.. هعيش إزاي؟!".

وأضافت: "أنا مش شايفاها إغراء الصراحة، أنا شايفاها موضوع زي "اللعب مع الكبار" هل ده إغراء؟، قصة موجودة في المجتمع، فيه ناس بتحب بعض ومش عارفين يتجوزوا".

وتابعت:" فيلم زي (الكيت كات) هل ده إغراء؟، ده فيلم علامة في السينما رغم إن فيه قبلات"، وحول لجوء بعض الفنانين حاليًا لفكرة التمثيل دون لمس؛ عقبت قائلة: "مش مع قصة أقول أه ولا لأ؟ أنت جاي  تعمل فيلم، تشوف ورقه، والمخرج عاوز يوصل فيه إيه؟، وبعدين هيا فين السينما دلوقتي؟، دي لسه بادئة ترجع شوية بشوية.. لزمتها إيه دلوقتي نقول أه ولا لأ؟ اللي عايز يشتغل يشتغل، واللي مش عاوز ما يشتغلش".