رئيس مجلسي الإدارة والتحرير
محمد الباز
رئيس مجلسى الإدارة والتحرير
محمد الباز

«مش هروح لـ أشرف زكى».. رحمة حسن تكشف تطورات أزمتها بعد اتهامها منتجًا بسرقتها

ستوديو

كشفت الفنانة رحمة حسن، عن تطورات أزمتها الأخيرة مع المنتج هاني أسامة، والذي أعلنت عن اسمه لأول مرة، أمس الأحد، في أزمة مالية جمعتها به منذ 2018، مؤكدة مطالبتها بمستحقات مالية يماطل هو في دفعها.

وكتبت، عبر حسابها الرسمي بموقع تبادل الصور والفيديوهات،" إنستجرام: "أولا: "كل الاحترام والتقدير للدكتور أشرف زكي على استجابته وسؤاله.. وأحب أوضح إن الفلوس اللي ليا عند هاني أسامة المنتج هي باقي أجري عن مسلسل سابع جار.. وكان ليا جزء كبير منها.. ولجأت للدكتور أشرف في ٢٠١٩ علشان يساعدني.. وحصل.. واداني جزء بسيط من فلوسي.. وللعلم الوقت ده كان بابا تعبان وفي المستشفى وهاني أسامة كان عارف وقلتله إني محتاجه الفلوس أرجوك.. ورفض بعدها يديني أي فلوس من باقي أجري ومكانش بيرد على رسايل أو مكالمات مني.. للأسف بابا اتوفي بعدها بكام يوم.. ومن ساعتها وأنا تعبانة ومش ناسية هو عمل معايا إيه".

وأضافت: "وكان صعب عليا إني أطلب تاني من دكتور أشرف إنه يتدخل لأن هاني مش بيستجيب أصلا.. وأنا كنت تعبت من كتر ما بطلب حقي وهاني بيتهرب.. بس بين كل فترة والتانية كنت ببعتله رسالةـ وأكلمه وبرضوا مفيش حاجة.. كل ده بمنتهى الذوق والاحترام والرسايل موجودة معايا من ٢٠١٨ كله على التليفون.. وطبعا الوقت بيعدي وأنا معنديش شغل ماعنديش دخل.. تعبت وبعتله تاني من كام يوم وقلتله.. وبرضوا مفيش حاجة.. وكمان العقد بتاعي معايا ومخصوم منه الضرايب اللي دائما بدفعها على أي عمل بشارك فيه من زمان".

وتابعت: "العقد بتاعي على مسلسل ٦٠ حلقة.. هاني صور وذاع ٦٧ حلقة يعني ليا كمان ٧ حلقات مش موجودين في عقدي وماختش عليهم كمان أجر وماطلبتش بيهم أصلا بس هو عارف.. الفكرة إنه طلع إن في كذا شخص في الشغل مش أنا بس عندهم نفس الموقف مع هاني.. ويمكن بفلوس أكتر بكتير وفي نفس الموضوع والنقابات والقضية وما إلى ذلك".

وأوضحت موقف الدكتور أشرف زكي من أزمتها موجهة له الشكر قائلة: "أما بخصوص إن الدكتور أشرف طلب مني أروحله النقابة عشان نتكلم في الموضوع .. أنا قلتله أنا مش عايزة أتعبه أكتر من كدا معايا.. خصوصا إني عارفة إني مش نقابية وإني بشتغل بتصاريح ومش عايزة أضيع وقته، خصوصا إنه ساعدني قبل كدا.. وكمان عشان عارفة إن هاني مش بيستجيب عشان هو منتج فتبع نقابة تانية.. وكنت عارفة إن الدكتور أشرف كلمه قبل كدا في موضوع الفلوس ده وبرضوا محصلش حاجة.. يعني لو كان عايز يدفع كان دفع من زمان".

واختتمت حديثها: "المسلسل اتذاع وخلص وهاني عمل بعده كذا عمل.. أنا قلت للدكتور أشرف إني مش هاقدر آجي لأني تعبانة وأنا مش هاشيل البوست لحد ماخد فلوسي.. لأني بحاول أجيب حقي اللي بقالي ٣ سنين مش عارفة أجيبه.. شكرا لكل حد اهتم .. بس أنا حبيت أوضح إيه اللي بيحصل.. وشكرا لكل اللي ساعد واللي بيحاول يساعد.. وللعلم أنا لسه ماخدتش فلوسي برضوا.. شكرًا.. وأخيرا.. لم أدلي بأي تصريح صحفي ولست مسئولة عن أي كلام يكتب بالنيابة عني".