أعلنت المطربة رنا سماحة، إنهاء خلافاتها مع زوجها الملحن سامر أبوطالب، وحيث نشرت فيديو لها عبر حسابها الرسمي بموقع تبادل الصور والفيديوهات إنستجرام، مع زوجها خلال حفل اكتشافهما نوع المولود.
وأرفقت رنا، مع الفيديو رسالة من زوجها سامر أبوطالب، قال فيها: "أولًا الحمد لله، ثانيًا هقول الكلمتين الجايين دول لـ(أم مالك)، مراتى حبيبتى وأم ابنى اللى اكتشفت فى الفترة اللى فاتت دى أنى مقدرش أعيش من غيرها ولا حتى بكون مبسوط فى أى حاجة حتى أبسط الأشياء هى لازم تكون فيها معايا بحبها أوى بجد يمكن كنت أوقات بعند بس اكتشفت أنى فعلًا ما ينفعش أكون غير ليها وهى ماتنفعش تكون غير ليا.. آسف لو زعلتك فى أى حاجة وربنا يباركلى فيكى ويحفظنا من كل شر ويبعد عنا الحسد والحقد واللى كارهين يشوفونا مرتاحين وهاديين، والحمدلله دائمًا وأبدًا".
وأضاف:" نيجى بقى لـ(برنس قلبى) ابنى وقرة عينى حبيبى وصاحبى وأخويا اللى لسه ماشوفتوش (مالك) مش هقولك غير أنى بحبك ولما تيجى بالسلامة هقولك حاجات كتير أوى نفسى أقولهالك ومش هتفارق حضنى أبدًا، بحبك يا رنا وبحبك يا مالك.. شكرًا للناس اللى كانوا بيكتبولى كلمة حلوة عشان عاوزين يشوفونا تانى مع بعض".
لتعلق الفنانة رنا على رسالة زوجها قائلة:" الحمدلله يا حبيبي ربنا يخلينا لبعض يا رب ويخليك ليا ولمالك يا رب ويبعد عننا أي حاجة وحشة.. عيشنا فترة صعبة والحمدلله أنها عدت، مفيش بينا أسف يا أبومالك بس عارف لو عملت كده تاني.. ربنا ميحرمناش من بعض ويحفظ بيتنا ويكبر ويعمر بوجودك وسطنا يا رب آمين.. بحبك يا جوزي".
