رئيس مجلسي الإدارة والتحرير
محمد الباز
رئيس مجلسى الإدارة والتحرير
محمد الباز

والد مهندس الدقهلية المقتول: «ابنى كان وشه أبيض وبيضحك فى المشرحة»

ستوديو

قال عاطف الشربيني والد مهندس المنصورة القتيل، إنه "ابنه أخذ شيكات على صديقه محمد أبوالعز بمبلغ 680 ألف جنيه"، مضيفا: «زميله دا فلس ومعدش معاه فلوس، وابني الوحيد اللي كان واخد شيكات على الشخص دا لأنه كان واخد فلوس كتير من ناس في البلد».

وأضاف «الشربيني» في مداخلة هاتفية لبرنامج «رأي عام» الذي يقدمه الإعلامي عمرو عبدالحميد والمُذاع على فضائية "TeN": «ابني كلم صاحبه محمد وقاله عايز الفلوس وطلب منه أنه يجيله عشان ياخد فلوسه، واتقابلا مع بعض وكاميرات المراقة ظبطت ابني مع محمد أبوالعز واقفين على كوبري الجامعة في حته ضلمة، والقاتل مسكه خدره وزقه في النيل وسابوه ومشي».

وتابع: «تاني يوم بسأل على ابني مراته قالتلي مباتش في الشقة، وأنا آخر مكالمة كلمته كان مع صاحبه عند كوبري الجامعة وقالي هجيلك بس عربية محمد صاحبي سخنت ومستنينها تبرد وهنيجي وجايز أروح ميت غمر».

وأوضح: «ابني قالي هاخد الفلوس من محمد أبوالعز وأمشي، والقاتل لما اتسأل عنه قال إنه أخد تاكسي ومشي، وبحثنا عن ابني في كل المستشفيات والمباحث بدأت تدور في كل الأماكن لحد ما توصلت إدارة مجلس حماية النيل بعد 10 أيام».

وأكد: «الكراكة طلعت ابني من تحت وادي النيل، المتهم كان عامل تخطيط أن ابني يقع في النيل والمياه تجرفه ناحية دمياط والمشكلة تبعد عنه وربنا رايد يفضحه، وفضلت الجثة في مكان وقوفهم على الكوبري"، مضيفًا: «ابني كان نايم في قلب المشرحة كان وشه أبيض وبيضحك وزي ما بيقولي أنا في الجنة يا بابا والله، وبطلب من الناس تفضل معايا ويتكاتفوا معايا عشان أجيب حق عيال أحمد ابني، وبشكر كافة القيادات اللي ساهمت في معرفة تفاصيل مقتل ابني».