حسمت الفنانة رنا سماحة، الجدل حول خبر انفصالها عن زوجها الملحن سامر أبوطالب، خاصة بعد إلغاء متابعة زوجها، كما حذف الثنائي كل الصور التي تجمعهما في جميع المناسبات حتى حفل زفافهما.
ووجهت رنا رسالة شديدة اللهجة، عبر حسابها بموقع الصور والفيديو "إنستجرام"، لتنهي التساؤلات الي أثيرت خلال الأيام الماضية حول انفصالهما من عدمه.
وكتبت: "عذرَا أيها الـtrend، فلدي ما هو أغلى من كنوز العالم، اتعلمت في بيت أهلي إن العلاقة بين الراجل والست أمانة مينفعش تطلع بره البيت، خطيبتك مراتك طليقتك أيًا كان، الأمانة دي ولاد الأصول بس اللي بيعرفوا يصونوها وميفشوش أسرارها، ولاد الأصول بس اللي مبيكذبوش ولا بيتدعوا على بعض بالباطل، ولاد الأصول مبيقذفوش المحصنات كبيرة من الكبائر، ولاد الأصول بس اللي مبيخونوش الأمانة، ولاد الأصول بس مبيفجروش في الخصام، ولاد الأصول مش محتاجين يستعطفوا حد ولا محتاجين يدعوا المثالية بيسيبوا أخلاقهم تتكلم عنهم ومبيتكلموش هم عنها".
وأضافت: "ولاد الأصول مبيلقحوش على بعض مبيجيبوش سيرة بعض غير بالخير، ولاد الأصول بيعاشروا بالمعروف وبيفارقوا بالإحسان، ومبينسوش الفضل بينهم، ده اللي ربنا أمرنا بيه ده اللي أهالينا ربونا عليه ده اللي الإنسانية بتقوله، أي حاجة غير كده تبقى عدم تربية.. قلة دين.. انعدام أخلاق، انعدام الأخلاق ده مينفعش نزينه ونقول أوه ترند، في داهية الترند اللي ينسينا أخلاقنا وتربيتنا وأصولنا".
وتابعت: "الإنسان بيعيش حياته وبيمشي رحلة، مش هيفضل منها غير سيرتك وأعمالك الطيبة وكلمتك اللي بتتصدق بيها، سيبوا الخير وإنتوا ماشيين عشان الناس تدعيلكم بدل ما يدعوا عليكم، اجعل من يراك يدعو لمن رباك، بطلب من أي حد هيكلمني عشان يعرف أي تفاصيل تخص حياتي الخاصة يوفر على نفسه وميكلمنيش ميهمنيش السبق الصحفي ولا الشو الإعلامي ولا الأكثر بحثًا غير في شغلي فقط، في الخير والفرحة وبس".
واختتمت رنا سماحة حديثها: "عاهدت نفسي وأهلي والناس إلى بحبهم إني أكون خير قدوة عاهدت ابني اللي عيني لسه مشافتوش إني أربيه على الأصول والاحترام والرقي عاهدته إني أربيه يبقى راجل ف متستنوش مني ما يفعله الآخرون مش عايزة أبقى ترند".
