وجه مغني المهرجانات حمو بيكا، رسالة هجومه الثانية، إلى منتقديه، بعدما واجه سيلًا من التنمر، بسبب عدم استكماله للتعليم، وذلك عقب تهنئته لطلاب الثانوية العامة.
وعبّر عن استيائه من التنمر الذي واجهه من خلال منشور له على صفحته بموقع التواصل الاجتماعي "فيسبوك"، قائلًا: طب وايه يعني عندي اخواتي وقرايبي بيقرولي وبيكتبولي اللي أنا عايزه؟.. ببساطة محدش فينا اتولد عارف كل حاجة!.. كلنا كنا مغيبين عن كل حاجة وكلنا جهلة".
وأضافت:" الدكتور جاهل عن المحاماة، والمحامي جاهل عن المحاسبة، والمحاسب جاهل عن المهندس.. "الكمال لله وحده "- محدش كامل".
واختتم:" وزي ما قولت انا منولتش شرف التعليم بس اتعلمت إزاي اشتغل واشيل مسئولية اتعلمت إزاي اشقي من صغري ومقولش لحد إديني.
زي ما أنا اتعلمت حاجات كتير جدًا في الحياة - إنت يا متعلم هتفضل جاهل بيها.. فإن حد يكتبلي أو يقرألي .. دي حاجة متخصش حد في الدنيا.
صباحكم فل وجمعه مباركة عليكم جميعًا".
وكان قد كتب منشورًا عبر حسابه بالأمس مهاجمًا فيه متابعيه ممن تنمروا عليه قائلًا:" بتقولو عني جاهل ومش متعلم.. مع إن دي حاجة أنا عمري ما أنكرتها ولا حتى خبيتها على الناس ومن يوم ما ربنا كرمني واشتهرت وبقى ليا جمهور بس هرجع وأقولكم تانى إنها حاجة مكنتش بإيدي".
وأضاف: "إنت بقي يا (متعلم) التعليم علمك إنك تقعد تعاير الناس بعيوبها؟ التعليم علمك إنك تفضل تتنمر علي خلق الله؟ التعليم علمك إنك مباح ليك الشتيمة في حد هو أقل منك فى شىء؟ أكيد لا فمتجيش من ورا شاشة وكيبورد تعمل فيها عم الناصح وإنت أصلاً موركش حاجة تعملها".
واختتم: "أنا متعلمتش ومنولتش الشرف الكبير ده بس اتعلمت حاجات كتير في الدنيا إنت متعلمتهاش لسه، اتعلمت احترام الكبير والصغير.. اتعلمت أشقى وأتعب من صغري، اتعلمت إني مغلطش في حد.. اتعلمت حاجات كتير جدًا في حياتي إنت عمرك ما تتعلمها طول ما إنت باصص للناس..! فكر في كلامك كويس وكومنتاتك كويس قبل ما تكتبها وقبل ما تقول إنك متعلم افتكر إنك في (تربية وتعليم) يعني التربية قبل التعليم".
