كشف محمد شريف، مهاجم النادى الأهلي ومنتخب مصر، أن فريق الأهلي أثناء توجهه للمغرب لم يستهن أبدًا بلقاء كايزر تشيفز الجنوب إفريقي أو أي مباراة يخوضها النادي مع أي فريق.
وقال خلال حواره ببرنامج " كلمة أخيرة "، مع الاعلامية لميس الحديدي، المُذاع عبر فضائية "ON": "الإعلام اللي صدر فكرة أننا واثقين من الفوز وأننا أخدنا البطولة لكن إحنا كلاعبين حساباتنا بتختلف وإحنا بنخوض أى مباراة ومش بنقلل من أهمية الفريق الي هنقابله لانه ببساطة ممكن أي كوروة ملهاش لازمة تحسم المباراة وما نعرفش نرجع الماتش ونفضل نعاني بعدها لكن إحنا بنستعد كويس من البداية".
وأضاف: "إحنا من أول المباراة وإحنا واخدين عهد على أنفسنا إننا نلعب ماتش ضاغط ونفرض شخصيتنا في الملعب ونبذل كل مجهود، والطرد اللي حصل في نهاية الشوط الاول لهابي لاعب كايزر منحنا أفضلية في بقية المباراة".
وتابع : "فرقة كايزر، بتلعب دفاع أكثر من الهجوم وإحنا كنا دارسين ده جدًا أنهم قادرين على الدفاع الجيد ولديهم مرتدات جيدة .. وكنا خايفين من النقطة ده حتى لو كنا ضاغطين في الملعب وكنا حاطين السيناريو ده في دماعنا إننا وإحنا بنهاجم ناخد بالنا من المرتدات".
وحول كواليس ما دار بين موسيماني ولاعبي الأهلي بين الشوطين الأول والثاني قال: "مقلش حاجة غير إن أداءنا كويس بس محتاجين نسرع الريتم، شوية ونحاول نوصل للمرمى في أسرع وقت"
وحول كواليس تسجيله الهدف الأول في مرمى كايزر تشيفز الجنوب إفريقي قال: "الجون الأول الكرة كانت مع أكرم وأنا كنت عند المساك الثاني وحسيت أنو سرح لحظة والمساك الذي أمامي لم يرني واعتقد أنني ما زلت في الخلف فقمت بقطع الكرة من خلفه لأعبر مساحة فارغة وأكرم لعبها كويس ليا .. لمحت الهدف بطراطيف عيني فرحت ناكشها".
