أصدرت الفنانة حلا شيحة، بيانًا جديدًا عبر صفحتها الشخصية بموقع "إنستجرام"، وجهت من خلاله رسالة شكر لكل من دعمها في أزمتها الأخيرة.
وقالت في تدوينتها: "حابة أشكر كل الناس الجميلة على رسايلهم الجميلة المشجعة.. وحابة أشكر كل الصحافة اللي نشرت فتوى دار الإفتاء النهاردة اللي موقفي هو نفس موقفها اللي بيوضح إن التمثيل والفن عموما زي أي مهنة في الدنيا حلاله حلال وحرامه حرام.. وأنا لا أحب أن أكون جزءا من أي نوع من التطرف سواء باسم الدين أو باسم الفن.. ولو نقابة المهن التمثيلية ترفض موقف دار الإفتاء الواضح فهنيئا لي بشطبها لعضويتي".
وأضافت: "حبي للفن محدش يقدر ينكره ولا يزايد عليه.. أنا ماتكلمتش غير عن نفسي وبقدر كل زمايلي.. الزميل الوحيد اللي ذكرته هو اللي الموضوع أصلا متعلق بيه.. وعتابي ليه لحسن ظني بيه.. والعتاب في الملأ عشان الكليب في الملأ، وبالنسبة للكلام غير اللائق عن الأجر.. كل اللي في المجال شاهدين إني كنت اعتذر عن عدد كبير من الأعمال الفنية وكنت بقبل أجور أقل مما يتناسب معي تعاونا مع صناع العمل.. وأصلا ما استلمتش الجزء الأخير من أجري في الفيلم لما أتأخر نزوله جدا وبدأت أتغير وأصلّح.. لأن بصراحة الكلام عن (أجر كبير) ضحكني".
وتابعت: "أنا فنانة بطبعي ومن صغري وكل اللي يعرفوني عارفين حبي للفن.. ودايما هعبر عن نفسي بمواهبي الفنية لما أحب لكن الجديد إني مش هاعمل كده على حساب اللي أنا مؤمنة بيه بجد جوايا زي ما قولت مؤخرا.. أنا لا أهاجم أحد ولا أحارب أحد ولا أنا أفضل من أحد ولا أنصح أحد قبل ما أنصح نفسي أولاً وكلنا نخطئ مفيش حد معصوم من الخطأ.. وبتمنى الخير دايماً لكل الناس بما فيهم كل زمايلي وصناع العمل".
واستطردت: "مفيش أجمل من إننا نعيش ونستمتع بحياتنا ونفرح ونتبسط ونبسط ولادنا ونفرحهم ونفرح معاهم ونربيهم على قيم وأخلاق مبقتش موجودة في أيامنا دي ونربيهم ونتربي معاهم ونغلط ونصلح وحنفضل نغلط ونصلح ونعيش مع كلام ربنا الجميل ونفرح بمنهجه ونحب الحق والعدل والخير والجمال والإبداع الرباني الجميل..جميل اننا نعمل كل ده وفق منهج مفيش أجمل منه ولا أعدل منه ولا أعظم منه في الكون كله".
