وجهت الإعلامية ريهام سعيد، رسالة لجمهورها في بث مباشر عبر صفحتها الشخصية بموقع "فيسبوك"، كشفت من خلاله إصابتها بمرض السكر.
وقالت في بداية الفيديو، إنها كلما كانت تتعرض لمتاعب كانت تقوم بمشاهدة برنامج "أمريكا جوت تالنت"، وتشاهد المتسابقين الذين لم يكن يتوقع أن ينالوا الباز الذهبي، ورغم ذلك يحققون نجاحًا وهذا ما يعطيها دافعًا للأمام.
وأضافت: "أرى أن من واجبي أن أنقل لكم التجارب التي مررت بها حتى أوفر عليكم المشوار الرهيب وكنت دائمًا أتحدث عن الصحة وأقول إنها أهم شيء وظهر أنها مقترنة بالأشياء التي نختارها، والتي بدورها تؤثر على الصحة، فالطريق الصعب كان لا بد أن تكون حنين بعض الشيء على نفسك".
وتابعت: "أنا طلعت تحاليلي أوحش حاجة والحمد لله وهو من التحاليل اللي ضايقتني أوي بخصوص السكر.. أنا اكتشفت أن جالي سكر ودي حاجة لا ألوم عليها حد غير نفسي، لأن أنا اللي حملت نفسي فوق طاقتي وكنت دايما بقول إن ربنا مش بيدي حد حاجة غير على قد طاقته".
واستكملت: "السكر للأسف حاجة بشعة ولازم تحارب وما تاكلش وما تزعلش ودي حاجة صعبة أوي وسط اللي بنعيشه حاليا، لأن إحساس الظلم أكتر حاجة بتوجع وبتضايق، وعايزة أنصحكم ما تجوش أبدا على نفسكم ومفيش حاجة مستاهلة لأن كله بتدابير ربنا، وأهم حاجة لو ليكم أعداء زي ما الرئيس قال: لما تكون عايز ترد على منتقديك ما تقعدش ترد على كل واحد".
وأضافت: "طول عمري مكرسة نفسي إني أساعد الآخرين، لكن أول مرة أبقى مكلفة إن أنا اللي بتعالج، وقضيت 20 سنة أخلي بالي من الناس ومن شغلي ومن أقاربي وعائلتي، لكن جاء الوقت اللي أخلي بالي فيه من نفسي".
واستطردت: "عندي النية إني أبقى ناجحة أكتر، ولكن أنا كنت عاطفية أوي وأرد بسرعة وعايزة أجيب حقي.. لكن خلاص مش هضيع عمري علشان معنديش حد يربيلي عيالي، فعلى الأقل أقف جنب ابني وأنا بصحة كاملة.. وكل واحد ضايقني ربنا يسامحه ويديله على قد نيته، وأدعو الناس اللي عندهم سكر أنهم يحافظوا على صحتهم قدر الإمكان".
وواصلت: "سعد الصغير بيتفرج علي، وسعد من أجدع الناس اللي شفتها في حياتي، أنا جالي سكر يا سعد"، وسمحت لناس يضايقوني طوال 20 سنة بدون وجه حق، وسمحت لنفسي بغبائي إني أضايق نفسي، لكن جاء الوقت اللي أخلي بالي فيه من نفسي وأوفر وقت كتير لي من غير أولادي أو شغلي ومن غير ما أهتم مين اللي بيتبلى علي ومين اللي بيهاجمني.. ربنا ينصرني على أعدائي اللي معرفش هم أعدائي ليه، ومش ذنبي إني ناجحة وأن اسمي رنان".
واختتمت كلامها قائلة: "لما وصلتني التحاليل حبيت أقولكم خلوا بالكم من نفسكم ومفيش حاجة في الدنيا مستاهلة لأن كل حاجة هتعدي، وما تاخدوش فوق طاقتكم، لأن ربنا عارف أنه بيدي كل واحد حاجة عارف إنه هيتحملها.. ما تضايقوش نفسكم أبدًا"
وكانت ريهام سعيد، قد أعلنت مؤخرًا توقف عرض برنامجها "صبايا الخير"، ومغادرتها لقناة "النهار" بعد انتهاء تعاقدها معها.
