نشرت الفنانة حلا شيحة، صورة من جنازة الفنان الراحل سمير غانم عبر حسابها الرسمي على موقع "انستجرام".
وعلقت الفنانة حلا شيحة: «مشهد محتاج لحظات للتأمل ووقفة طويلة مع النفس كل ما تحصل حالة وفاة من قريب أو بعيد بلاقي نفسي جوا المشهد وبتخيل اللحظة دي لأنها مفيش مفر منها حتيجي فجأة أو بعد مرض المهم إنها جاية وكلنا حنمر بيها».
وأضافت: «بفكر يا تري هل أنا مستعدة للحظة دي؟! مستعدة لاستقبال عالم تاني؟ مستعدة أقابل رب العالمين؟! مشهد مرعب لكن الامتحان خلص خلاص ومستنية النتيجة، كل يوم بيموت من حبايبنا وأقرب الناس لينا كلنا بنحضر الدفن والعزا طب وبعد كدة ايه! منا اللي بيكمل عادي زي ما كان ومنا اللي مش عايز يركز في اللحظة دي ومنا اللي بيفكر شوية وخلاص بعدها بينسي ومنا اللي مش حيعدي عليه المشهد ده كدة وخلاص».
وتابعت: «أنا بسأل نفسي يا ترى إحنا بنفني عمرنا في إيه وفي مثل مشهور بيقول (العمر مش بعزقة) مركزين بس في نجاحاتنا وآمالنا ومراكزنا، في مشاكلنا ومطحونين في دوامة عمرها ما حتخلص، يا تري ربنا في حياتنا فعلا؟!».
واختتمت:«مش عارفة أعدي المشهد ده كدة وإمبارح فضلت صاحية وصليت الفجر ومش عارفة أنام بفكر في أستاذ سمير غانم الجميل اللي كنت بتفرج عليه من صغري وقبله أستاذ محمد الصغير وفكرت لو ده كان معادي حكون مستعدة؟! كلام صعب بس ده اللي جوايا».
