قالت الفنانة ندى موسى، إنها تتابع مباريات كرة القدم، مشيرة إلى أنها تشجع نادي الزمالك بسبب والدها، لكنها تفضل مباريات المنتخب الوطني لكرة القدم.
وعلقت الفنانة في مداخلة هاتفية ببرنامج «صباح الخير يا مصر»، الذي يعرض عبر القناة الأولى، على نجاحها في مسلسلي "هجمة مرتدة"، و"بين السما والأرض"، قائلة إنهما كانا صعبين للغاية لأنها متناقضين، مضيفة "أنا بعيدة عن كل البعد عن دوري في مسلسل هجمة مرتدة، وحضرت كويس واتفرجت على حاجات كتير عشان أفهم أبعاد الشخصية، وبعد شوية بدأت أفهم حاجات مكنتش فاهماها".
وأضافت: "مشاركتي في مسلسل هجمة مرتدة نقلة نوعية في مشواري، خاصة إنه شبه الحاجات اللي كنا بنشوفها زي الاختيار ورأفت الهجان، وعرفت حاجات مكنتش عارفها أو فاهماها، ربنا يكون في عون الناس اللي طول الوقت ده شغلها بس".
وتابعت ندى موسى، "وإحنا كنا بنصور هشام سليم خبط في الازاز مكنش واخد باله وايده اتفتحت، وطلعنا بيه على المستشفى ورجع كمل تصوير عادي مصدقتش نفسي، الناس بدأت تاخد بالها إننا بنتعب جدا مش مجرد بناخد كلام ونقوله خلاص".
وحول مسلسل بين السما والأرض، قالت: "كنا بنصور في الدقي الساعة 8 صباحا والدنيا كانت زحمة والناس متعاونة جدا، وكلنا كنا قلقانين لأنها تجربة اتعملت قبل كده والناس شايفاها وعارفاها، ومخرج المسلسل ماندو العدل كان أكتر واحد مرعوب فينا، وبالتالي الموضوع كان صعب جدا"، مشيرة إلى أنها ستقضي العيد مع والدتها لأنها لم تزرها في شهر رمضان بسبب ظروف تصوير المسلسلين، ولفتت إلى أنها ستشارك في فيلم كما تصور مشروعا فنيا مع الفنانة هند صبري باسم "البحث عن علا"، وهو مرتبط بمسلسلها الشهير "عايزة اتجوز".
