تصدرت الفنانة الشابة أميرة أديب، تريند جوجل، بعد كشفها عن سعر زجاجة المياه في الساحل الشمالي، وتعبيرها عن استيائها من الأسعار هناك.
وقالت أميرة في فيديو عبر خاصية القصص القصيرة على موقع "إنستجرام"، إنها صُدمت من الأسعار في الساحل الشمالي، مشيرة إلى أنها تتواجد حاليا هناك لقضاء عطلتها الصيفية.
وسردت موقفا تعرضت له صديقتها، إذ ذهبت لشراء زجاجة مياه من أحد الأماكن، ووجدته يطلب منها 250 جنيها، موضحة "كان هيجيلي سكتة قلبية، في الساحل صاحبتي رايحة تجيب مايه في أحد الأماكن اللي كنا فيها، بتطلع فلوس قالها 250 جنيه، what عشان إزازة ماية، أول مرة أجي الساحل الشمالي السنة دي، ودي كانت أول سنة برضه أسافر أكثر من مكان في الصيف خارج مصر، وصرفت في كل سفرية أقل بكتير من اللي بصرفه في الساحل".
وتابعت أميرة: "أنا من الناس اللي مش بتصرف في السفر كتير، وبشوف أي طريقة أصرف أقل مصاريف ممكنة، لكن اللي بيحصل ده مهزلة فيه حاجات أكتر في مصر ممكن نعملها وبتكون أرخص بكتير"، وعلقت "اتصدمت أوي".
بلبس "ساكند هاند"
وكانت صرحت الفنانة أميرة أديب، في فيديو عبر خاصية الستوري: "أنا بتهزق كتير أوي لما حد يسألني التيشيرت بتاعك ده منين، أنا غالبية الحاجات اللي بجيبها بتبقى ساكند هاند، يعني بجيب لبس كان بتاع ناس قبل كده، عشان البيئة".
وأضافت: "أنا مش بني آدمة بتتبسط خالص بالحاجات القيمة وكده، إني أجيب لبس غالي مش حاجة بتبسطني، اللبس بالنسبالي من أساسيات الحياة مش حاجة أنا بحبها أوي".
وتابعت: "عشان كده مش بعرف معظم الوقت أقولكم لبسي ده منين؛ لأن أنا نفسي مش عارفة هو من فين، فلو سمحتم بطلوا تهزقوني، ولما بيكون في حاجة أنا شارياها بقول والله".
من هي أميرة الديب؟
ممثلة مصرية من مواليد محافظة القاهرة، درست تمثيل وإخراج في مدينة لوس أنجلوس بالولايات المتحدة الأمريكية، ونشأت في عائلة فنية، جدها من جهة الأب هو الكاتب الكبير عبدالحي أديب وجدها من جهة الأم هو المخرج المسرحي الكبير سلامة حسن.
والد الفنانة أميرة هو المخرج عادل أديب ووالدتها هي الفنانة منال سلامة، وخالها الفنان شريف سلامة وعمها هو الإعلامي عمرو أديب وعماد الدين أديب.
وخاضت أميرة أديب أول تجربة في التمثيل من خلال مسلسل "ولاد ناس" 2021.
شاركت مؤخرًا في بطولة مسلسل "مين قال"، والذي ضم مجموعة كبيرة من الشباب بينهم أحمد داش، إلى جانب النجم الكبير جمال سليمان، والفنانة نادين.
